عجل تراي احتريك.. ....

المساهمات : 102 تاريخ التسجيل : 20/10/2007

السلام عليكم يا هل التراث

قصه حقيقيه من التراث القديم..

المصدر: ارشيف الذكريات
المكان: احدى قرى شمال الرياض
الزمان: سنة 1280هـ

ابو سليمان رجال مطرق ..طويل وله وجه طلق مع الرجاجيل..وراعي علوم سنعه من الله خلقه وهو راعي طاعه وقنوع باليسير..كانت حياته في قريه من قرى نجد شمال الرياض..وعايش حياة الكد والتعب من الله خلقه وهو ما يعرف الا نخله وحاجة اهل بيته..

الطيابة في بعض الاحيان..او بالاصح الفراسه يمكن ما تكون محلها..ومن كثر ما هو مديون..ابو سليمان حاول انه يسدد دينه ويلتفت لاموره في الزراعه والكد اللي هي سبب ديونه وتكاثرها..لكن امر الله يسبق الفكر والتدبير..

وفي يوم من الايام ابو سليمان ضاقت عليه دنياه ..وصارت ديونه تشل تفكيره حتى اصبح يقاطع ربعه واهل سوقه ومجالسهم..وقصرت خطوته عنهم الا حد الصلاة..لانه كان متدين بالفطره ومن الله خلقه وتربى على يد ابوه وهو راعي طاعه مثله ملازم المسجد..جاه واحد من ربعه بعد ما لاحظ عليه الصده والانعزال وهي مهيب من عوايده اللي كان عليها..وقابله رفيقه ابو حمد بعد صلاة المغرب..

كان ابو سليمان يشد الخطوه وهو يبعد مع اختلاط الظلام.. وابو حمد وراه ينادي..وقف ابو سليمان والتفت عليه مثل العاده راكد ..سم ابو حمد !! قال له يابو سليمان لك مده على هالحال وانت من يسلم الامام وخطوتك ماشاء الله على حد بصرك..!! رد عليه وقال وش تبيني اسوي يابو حمد..من تحمل الدين صار همه همين ..شايل همي من كثرة الدين ولا يسفهل لي بال وان على هالحال..رد ابو حمد عليه وقال ترا المثل يابو سليمان يقول " ياحلقي ما دونك الا يدي " قال ابو سليمان وش قصدك؟؟ قاله بع النخل وفك روحك من الدين وامر الله من سعه..

ابو سلميان ما جا في خاطره بيعة النخل..لكن ابو حمد مثل اللي قدح له نور في الظلام..وبعد ما رجع ابو سليمان للبيت جلس يفكر في الامر كثير..وشاور ام العيال ووافقت ابو حمد على رايه..لكن ابو سليمان نظرته بعيده ويخاف من زلة الدنيا ثم يضيعون عياله من بعده..!! قالت ام سليمان لو بعت النخل ووفيت دينك ترا ابرك من انك تترك الدين ورث لعيالك..

ابو سليمان صار مثل اللي مادينه على مله..بعد ما سمع كلام زوجته..قال في نفسه ما بعد هالكلام كلام..يالله الخيره والرجا في صاحب العرش سبحانه..توكلت على الله ببيع النخل واسدد الدين.. والعيال ان مالت الدنيا بي لهم الله ما يضيع خلقه..

من شرقة الصبح وابوسليمان ناصي واحد من ربعه له معارف في التجار واهل المال..وقال له تراي ببيع النخل علي دين ابي اسدده..قال له رفيقه ابشر بطولة عمرك وانا ابدور لك زبون..امهلني اسبوع وارد لك خبر..

بعدها جا رفيقه معه البشاره وقال له ترا فيه تاجر يبي يشتري النخل وبيجي يمك العصر يشوفه..قال ابوسليمان الله يحييه..وبعد ما صلى العصر ارتكز له عند باب النخل والا الرجال جاي مقبل سلام عليكم السلام..ومدوا الخطوه في وسط النخل ..بعد ما تفقده ..عجبه وقال تراي شريت ..قال ابو سلميان الله يبارك لك واتفقوا على مبلغ معين..وسلمه التاجر مقدم عباره عن نصف المبلغ ..وكان مبلغ الشرا كبير ومغري وتمت البيعه وطلع ابو سليمان من حلاله وسلمه للتاجر..على امل انه يكمل له الباقي بعدين..نيته صافيه

ابو سليمان سدد دينه من الدراهم اللي هي المقدم وارتاح من هم الدين والديانه..وبعدها جا ابو سليمان يبي باقي حلاله من التاجر..تفاجأ به وهو يرد عليه ويقول انت اخذت كل حلالك ولاباقي شي!!! ابو سليمان صعق من الكلام!! واسترجع..وحاول مع التاجر ولكن جحده..المشكله انه ما فيه مكاتبات ولا اوراق بينه في هاك الوقت ..وربما ان ابو سليمان من طيبته وصدق نيته واستعجاله في البيع جعلته يتوهق مع التاجر..

دارت الايام وابو سليمان يحاول مع التاجرانه يوفيه باقي المبلغ..ولكن التاجر مترهي..ومن النوع اللي يقيس الامور بمعيار العابث..ولما احس ابو سليمان ان الامر خرج من يده..استرجع ووكل امره لله..مرض ابو سليمان ولم يمهله المرض حتى يشوف باقي حلاله مستوفى وكامل..وقبل وفاته بيوم قال لولده الكبير ابيك توصل هالخط لفلان ( التاجر ) قال الولد ابشر يبه..!! قال ابيك ما تفتحه انت.. خله هو يفتحه..!!

الولد نفذذ طلب ابوه ووصل الخط للرجال وكان مكتوب فيه " عجل تراي احتريك " ..ولما فتحه وقراه..قال التاجر وين الوالد ؟؟ قال.. الوالد يطلبك الحل..!! صعق التاجر واصابته رجفه..قال باقي الدراهم زاهبه !! رد الولد عليه وقال الوالد موصينا ما ناخذ منك شي..!!

ورد في الاثر ان الله سبحانه وتعالى يغفر ما بينه وبين العبد من ذنوب..ولكن حقوق العباد لابد من استيفائها يوم يبعث العباد..

كم من عابث وكم من مستهتربحقوق الآخرين ..غرته دنياه..

ارجو انها تعجبكم ويكون فيها ولوفائده بسيطه.. والسموحه والمعذره على القصور